ڈاکٹرز کے ہاتھوں ڈاکٹر کی موت

ڈاکٹر حافظ سلمان علی لاہور کے نوجوان سرجن تھے‘ ان کی چھوٹی آنت پھٹ گئی اور پیٹ میں زہر پھیلنا شروع ہو گیا‘ یہ خود سرجن تھے‘یہ جانتے تھے اگر سرجری کر کے ان کی آنت مرمت کر دی جائے تو یہ ایک ہفتے میں صحت یاب ہوسکتے ہیں‘ یہ اپنی رپورٹس لے کر سروسز اسپتال پہنچ گئے۔

ایمرجنسی میں موجود ڈاکٹرز نے ان کی بات سننے کے بجائے انھیں کورونا کا مریض ڈکلیئر کر دیا اور اس کے بعد ان کی زندگی ٹریجڈی بن کر رہ گئی‘ یہ اسپتال میں منتیں کرتے رہ گئے لیکن سرجن کورونا کے خوف سے ان کے قریب نہیں جاتے تھے یوں ایک لائق ڈاکٹر ڈاکٹروں کی بے حسی کا شکار ہو کر دنیا سے رخصت ہو گیا‘ یہ ایک خوف ناک داستان ہے‘ یہ داستان بتاتی ہے ہمارا ہیلتھ سسٹم کس قدر ظالم اور سنگ دل ہے‘ آپ ڈاکٹر سلمان کی داستان ان کے بھائی حسان علی کے منہ سے سنیے۔

’’میرے بھائی ڈاکٹر حافظ سلمان علی کو 2 جون کو بخار اور کمر کے نچلے حصے میں درد ہوا‘ ہم اسے فاروق اسپتال ویسٹ ووڈ برانچ لے گئے‘ سلمان شام کے وقت وہاں پرائیویٹ پریکٹس کرتا تھا‘ اس کو ڈرپس لگائی گئیں‘ اس کا درد ختم ہو گیا‘ ہم اسے گھر لے آئے‘ اگلے دن شام 5 بجے اس کی کمر اور پیٹ میں پھر ہلکا ہلکا درد شروع ہو گیا‘ ہم اسے فوراً النور ڈائیگناسز سینٹر لے کر گئے‘ پیٹ کا دو گھنٹے معائنہ ہوا‘ پتا چلا ڈاکٹر سلمان کی چھوٹی آنت میں سوراخ ہو گیا ہے جس کی وجہ سے آنت کا مواد پیٹ میں جمع ہو رہا ہے لہٰذا اس کا فوری طور آپریشن ہونا چاہیے۔

لیبارٹری نے ہمیں رپورٹ اور پیٹ سے نکلنے والا مواد بطور سیمپل ساتھ دے دیا‘ ہم نے سلمان سے پوچھا‘ اس نے بتایا‘ گھبرانے کی کوئی بات نہیں ‘ میں دن میں اس طرح کے کئی آپریشن کرتا ہوں‘ یہ معمولی سا آپریشن ہے‘میں چند گھنٹوں میں ٹھیک ہو جاؤں گا‘ ڈاکٹر سلمان نے سروسز اسپتال سے ہاؤس جاب کی تھی‘ اس کا خیال تھا وہاں ڈاکٹرز اسے جانتے ہیں چناں چہ ہم اس کی خواہش پر اسے سروسز اسپتال کے سرجیکل ایمرجنسی یونٹ ون میں لے گئے ‘ وہ گاڑی سے اتر کر خود چل کر اندر گیا تھا اور وہ بالکل ہوش و حواس میں تھا‘ سلمان نے ڈیوٹی پر موجود سینئر ڈاکٹرز کو اپنا تعارف کروایا‘ اپنے مرض کی تفصیلات بتائیں‘ لیبارٹری کی رپورٹ اور سیمپل دکھائے اور فوری سرجری کی ریکویسٹ کی لیکن ڈاکٹرز نے سلمان کی بات غور سے سنی اور نہ رپورٹس اور سیمپل پر دھیان دیا۔

ڈاکٹرز نے اس کے پیٹ کا تھوڑا سا معائنہ کرنے کے بعد فوراً یہ کہہ دیا آپ کو کورونا ہے جس کی وجہ سے پیٹ میں پانی پڑ گیا ہے‘ میرے بھائی ڈاکٹر سلمان نے ڈاکٹرز کو بتایا’’میں جناح اسپتال میں جنرل سرجن ہوں اور میرا دو دن پہلے کورونا کا ٹیسٹ نیگیٹو آیا تھا اور رپورٹ اسپتال میں ہے‘‘ لیکن ڈاکٹرز نہیں مانے‘ ڈاکٹر سلمان ہر ڈاکٹر سے درخواست کرتا رہا میرا کورونا ٹیسٹ منفی ہے لیکن کسی نے اس کی ایک نہ سنی‘ ہم ڈاکٹر سلمان کو 9 بجے ایمرجنسی لے کر گئے تھے‘ ڈاکٹرز نے اس کو ڈرپس بھی لگادی تھیں اور پیشاب کی نالی اور ناک میں این جی بھی ڈال دی تھی لیکن جب ایک ڈاکٹر نے کورونا کا نام لیا تو تمام ڈاکٹرز خوف زدہ ہو گئے اور سلمان اور ہم سے کترانے لگے‘ سلمان اور ہم ان ڈاکٹرز کی منتیں کرتے رہے۔

انھیں النور اسپتال کی رپورٹ اور سیمپل دکھاتے رہے لیکن کوئی ہماری سننے کے لیے تیار نہیں تھا‘ایک بجے کے قریب سلمان کا ایکسرے کروایا گیا‘ آپ ڈاکٹرز کی جہالت کی انتہا دیکھیے ‘یہ ایکسرے دیکھ کر مزید بضد ہوگئے اس کو کورونا ہے‘ ڈاکٹر سلمان اور ہم سب گھر والے ڈاکٹرز کو سمجھانے کی کوشش کرتے رہے اس کی آنت کا مسئلہ ہے اور اس کو فوری سرجری کی ضرورت ہے لیکن ڈاکٹرز کی جہالت دیکھیے‘ یہ کہنے لگے یہ کوئی اتنا بڑا مسئلہ نہیں اور رپورٹس غلط بھی ہوتی ہیں‘ ڈاکٹر حافظ سلمان بھی بار بار ڈاکٹرز کو سمجھاتا رہا سر ’’یہ Acute Abdomin کا کیس ہے‘ اس کا واحد حل سرجری ہے‘ وقت ضائع نہ کریں‘‘ لیکن ڈیوٹی پر موجود ڈاکٹرز کے سر پر کورونا کا بھوت سوار تھا‘ وہ آپریشن سے کترا رہے تھے‘ اسی دوران ڈاکٹر سلمان کی ناک سے این جی لائین نکل گئی۔

سینئر ڈاکٹر نے کورونا کے خوف سے جونیئر ڈاکٹر بھیج دیا ‘وہ نا تجربہ کار تھا‘ اس نے چار بارباین جی لائین ناک میں ڈالنے کا دردناک تجربہ کیا‘ این جی لائین صحیح نہ ڈالنے کی وجہ سے اس کے تھوک میں خون آنے لگ گیا‘ وہ ہر پانچ منٹ بعد پانی کی کلی کرتا تھا‘ یہ سارا کھیل جونیئر اور سینئر ڈاکٹرز کے سامنے ہورہا تھا‘ میں اور میرے والدین ڈاکٹرز کی منتیں کرتے رہے سلمان تمہارا کولیگ ہے‘ پلیز اس پر رحم کریں اور اگر یہ ممکن نہیں تو پھر ہمیں اجازت دے دیں ہم اس کو کسی دوسرے اسپتال لے جائیں جب کہ وہ لوگ جواب میں کہتے تھے آپ اگر اس کو لے گئے تو کوئی دوسرا اسپتال اسے داخل نہیں کرے گا‘دوسرا راستے میں اگر اس کابلڈ پریشر ڈاؤن ہو گیا تو یہ انتقال کر جائے گا‘ سوچیے! اس وقت ہمارے لیے بے بسی کا کیاعالم ہو گا؟۔

ہمارے بار بار احتجاج پر ڈاکٹروں نے میرے بھائی کو میڈیکل ایمرجنسی میں شفٹ کر دیا‘ میڈیکل ایمرجنسی میں بھی ایک گھنٹہ کسی نے اس کو نہیں پوچھا کیوں کہ ڈاکٹر نے سلمان کی فائل میں لکھ دیا تھا ہمیں شک ہے کہ اس کو کورونا ہے لہٰذا میڈیکل ایمرجنسی کا عملہ بھی ڈر گیا اور وہ کہنے لگا یہ ہمارا نہیں یہ سرجری کا کیس ہے تاہم ہماری منتوں کے بعد انھوں نے اس کو ڈرپ لگا دی‘ ڈاکٹر سلمان بار بارڈاکٹرز کی منتیں کرتے رہے مگر کوئی ڈاکٹر ان کی بات سننے کے لیے تیار نہیں تھا‘ وہ ساری رات تڑپتے رہے‘ اگلی صبح 9 بجے میڈیکل ایمرجنسی کاسینئر ڈاکٹر آیا‘ اس نے مریض کی حالت دیکھی تو فوراً سرجری کا حکم دے دیا لیکن اسپتال کی انتظامیہ ابھی تک اپنی بات پر بضد تھی‘ یہ کورونا سے دائیں بائیں نہیں ہو رہے تھے۔

اس دوران سلمان کا بی پی ڈاؤن ہو گیا‘ ہم سلمان کا علاج ہاتھ میں لے کر پھر رہے تھے لیکن کوئی اس کی طرف دھیان دینے کے لیے تیار نہیں تھا ‘ بی پی ڈاؤن ہونے کے بعد ڈاکٹر سلمان خود ڈاکٹرز کی منتیں کرتا رہا‘ مجھے بی پی سپورٹ دے دیں لیکن ناتجربہ کار ینگ ڈاکٹرز کو وِین ہی نہ ملی پھر ڈاکٹر سلمان کے دو ہم جماعتوں (ڈاکٹر سعد اور ڈاکٹر بہار) کو پتا چلا تو انھوں نے آکر اپنے طور پر سپورٹ چلانے کے لیے چھوٹا سا آپریشن کیا‘ میں نے ڈاکٹرز کوکورونا کی منفی رپورٹ بھی لاکر دکھا دی مگر اس کے باوجود کسی نے نہ سنی‘ اس دوران ڈاکٹر سلمان کے کلاس فیلوز نے خون کا بندوبست کیا اور سینئر ڈاکٹرز پر پریشر ڈالنا شروع کر دیا‘ ڈاکٹرز نے آپریشن کا فیصلہ کر لیا لیکن مریض کو آپریشن تھیٹر لے جانے کی بجائے اسے سی ٹی سکین روم میں لے گئے۔

ہم نے پوچھا تو بتایا گیا اینس تھیزیا (Anesthesia) کی ٹیم بضد تھی جب تک ہمیں پوری طرح یقین نہیں ہو جائے گا اس کو کورونا نہیں ہم اس وقت تک آپریشن میں حصہ نہیں لیں گے‘ ہم اس وقت تک تمام ڈاکٹرز کو کورونا ٹیسٹ کی منفی رپورٹ دکھا چکے تھے‘ سی ٹی سکین روم میں جاتے ہی سلمان اونچی آواز میں دہائیاں دینے لگا خدا کے لیے اب تو میرا آپریشن کر دو‘‘ اتنے میں ایک ڈاکٹر آیا اور اس کو بے ہوشی کا ٹیکا لگا دیا اور بے ہوشی کی ہی حالت میں سی ٹی سکین کیا گیا‘ اس دوران ڈاکٹر سلمان کا سانس رکنا شروع ہو گیا۔

ڈاکٹرز فوراً اسے سرجیکل ایمرجنسی میں لے گئے اور اس کی سانس بحال کرنے لگے‘ اتنے میں ایک جاہل ڈاکٹر ہمارے پاس آیا اور مجھے اور میرے ابو کو سی ٹی سکین روم لے گیا اور کمپیوٹر پر سکین دکھا کر کہنے لگا ’’میں نہ کہتا تھا اس کو سو فیصد کورونا ہی ہے‘ آپ میری بات پر یقین نہیں کر رہے تھے‘‘ اندر میرا بھائی زندگی اور موت سے لڑ رہا تھا اور یہاں جاہل ڈاکٹرز کورونا کی منفی رپورٹ دیکھنے کے باوجود اپنی بات پر ڈٹے ہوئے تھے‘ آپ ستم پر ستم ملاحظہ کیجیے۔

ڈاکٹر سلمان کو آپریشن تھیٹر شفٹ کرنے کے باوجود اس کا آپریشن نہیں کیا گیا‘ سینئر ڈاکٹرز اس کا بی پی نارمل ہونے کا انتظار کرتے رہے‘اس دوران بات سوشل میڈیا پر پھیل گئی تو ڈاکٹرز کو سات بجے یاد آیا اس کا آپریشن بھی کرنا تھا آوروں سات بجے اسی بی پی ریٹ پر جو دو بجے تھا آپریشن شروع کر دیا گیا‘آپریشن ہوا تو ڈاکٹرز کو پتا چلا اس کی آنت میں واقعی لیکیج تھی اور اس کو کورونا نہیں تھا‘ ڈاکٹرز آپریشن سے پہلے تک کہتے رہے وینٹی لیٹر کا انتظام نہیں ہو رہا، لیکن جب سوشل میڈیا پر بات چلی تو ڈاکٹرز نے اپنی ساکھ بچانے کے لیے فوراً وینٹی لیٹر کا انتظام بھی کروا دیا۔

آپریشن کے بعد میرا بھائی سلمان میڈیکل آئی سی یو میں تین دن زندہ رہا پھر وہ وفات پا گیا‘ اگر میرے بھائی کا آپریشن بروقت ہو جاتا تو وہ یقینا آج زندہ ہوتا لیکن وہ اپنا علاج اپنے ہاتھ میں لے کر اپنے کولیگز کی منتیں کرتا رہا مگر کسی نے اس کی ایک نہ سنی یوں ڈاکٹرز کی کاہلی اور بے حسی کی وجہ سے ایک شان دار سرجن انتقال کر گیا اور میرے والدین ایک ہیرے جیسے بیٹے اور قوم مستقبل کے بڑے سرجن سے محروم ہو گئی۔

ہمارے دلوں پر جو بیتی اور جو بیت رہی ہے میں وہ الفاظ میں بیان نہیں کر سکتا تاہم میری آپ اور اس قوم سے التجا ہے ہمارے نقصان کا بدلہ اور انصاف اس دنیا میں ممکن نہیں ‘اس کا فیصلہ روز قیامت ہو گا لیکن ریاست کو کم از کم ڈیوٹی پر موجود تمام ڈاکٹرز کے لائسنس ہمیشہ ہمیشہ کے لیے کینسل کر دینے چاہییں تا کہ یہ دوسرے تمام ڈاکٹرز کے لیے نشان عبرت بن سکیں اور کسی دوسرے سلمان کے ساتھ ایسا نہ ہو‘ میری حکومت پنجاب سے بھی اپیل ہے اس واقعے کا حل کمیٹیاں نہیں ہیں۔

ڈاکٹرز کبھی اپنے ڈاکٹرز کے خلاف فیصلہ نہیں کریں گے‘ کمیٹیوں کے بجائے اس کا حل اس سسٹم کو ٹھیک کرنا ہے اور ڈیوٹی پر موجود تمام ذمے دار ڈاکٹرز کو فوری سزا دی جائے اور آئندہ کے لیے ایسا سسٹم بنایا جائے کہ پھر کبھی کسی ماں کے پیارے بیٹے کے ساتھ ایسا نہ ہو‘ میرا بھائی اس دنیا سے چلا گیا لیکن پاکستان کے ہیلتھ سسٹم پر ایک سوالیہ نشان چھوڑ گیا‘ یہ آج بھی کہہ رہا ہے’’میں تو ایک ڈاکٹر تھا‘ میرے ساتھ یہ سلوک کیا گیا تو عام انسانوں کے ساتھ یہ جاہل اور گنوار ڈاکٹرز کیا کرتے ہوں گے‘‘ ۔

ہم کس ملک میں رہ رہے ہیں آپ ذرا تصور کیجیے‘ ایک ایسا ملک جس میں ڈاکٹرز کو بھی اسپتال میں علاج نہیں ملتا‘ یہ ہے ہمارا ہیلتھ سسٹم‘ کیا ہم اس سسٹم کے ساتھ زندگی گزار سکتے ہیں؟ میں یہ سوال وزیراعظم‘ مشیر صحت اور پنجاب کی وزیرصحت کے لیے چھوڑ رہا ہوں اور آپ سے درخواست کرتا ہوں آپ اللہ سے روز صحت کی دعا کیا کریں‘ کیوں؟ کیوں کہ آپ نے اگر خدانخواستہ ایک بار کسی اسپتال کی سیڑھیوں پر قدم رکھ دیا تو پھر آپ یاد رکھیں وہاں سے ڈاکٹر سلمان کی طرح آپ کا تابوت ہی واپس آئے گا۔

بشکریہ…

شاید آپ یہ بھی پسند کریں

اسی طرح کی مزید پوسٹس

مینو